امسيات الحسن دنيا ومالها أمان /قلم حسن حلمي
امسيات الحسن. . 28/ 5/ 2021
( دنيا ومالها امان )
بقلم الشاعر : حسن حلمى
يادنيا يكفينا زيف وغرور
بضلك المسحور
ياما ناس بتبنى قصور
وقلبها مكسور
لفيت بحورك سبع والصبر
مكتوب بموالى
والدنيا طيفها غرور
ومرخص الغالى
بصبر صبر ايوب
والحمل حمل جبال
لا يوم شكيت للناس
ولا يوم يرخص الغالى
لكل فارس جواد
وانا فرسى كان غالى
ياما فردنا القلوع
فى البحر بالعالى
ووهبت ضلعى دروع
لنفدى بيه الغالى
طلع السهم من قريب
ليشق ضلعى حبيب
كانه بسم الافاعى
وجرحه ماله طبيب
يا دنيا يكفى الغرور
والزيف على الفاضى
لونتى ياما الوشوش
والقلب كان راضى
لا عمره فكر يخون
ولا باع زمان ماضى
صاين جميل الاحبا
ولو كان السيف
على الرقاب ماضى
عجبى عليك
يا زمن
لتعز يوم الخسيس
وترخص الغالى
دنيا ومالها امان
ومفرقه الاحباب
بالكدب والزيف والغرور
حتى البشر الوان
والقلب بات مفطور
بقلم الشاعر : حسن حلمى
تعليقات
إرسال تعليق