بقلم....مريم بوجعدة◇◇زجليتي ..( مشات اللمه ملي توفات لميمة )

زجليتي ..( مشات اللمه ملي توفات لميمة )

مشات اللمة لحلوة
ملي مشات لميمة
وصبحت الدنيا
بحال اللكمة مظلامة
ماعاد فيها لا سر لا ملح
ولا ذوق ولا مذاق..
ضاع  فيها كلشي
وضاعو حتى للشجر لوراق..
ضاعت اللمة..
وكلشي شد طريقو
وحتى العتبة ولات يتيمة...
وسط الدار ولا ينذب
وحتى السقف ولحجار..
ما بقى يطل علينا
لا خو ولا جار..
ولات الدار كحلة ظلمة..
وما بقات فيها لا صولة ولا رحمة..
وكل شي ضاع...
بين اليوم والبارح 
والنغمة ما لقات ليها أوتار...
وما عدت نفرز فيها
من همي لا ليل ولا نهار 
كلشي كحال عليا أيما 
يا ربي يا غفار
أنت عالم ما بيا 
أنت مول الشان العالي
أنت عالم الاسرار..
مشات البركة
ملي مشيتي يا لميمة
قولي ليا واش هاذا ماشي عار...!؟
الله يرحمك يا لحنينة
مشيتي وخلات عليا الدار
وراني نطلب العالي يا لميمة..
هو يشفيني م لضرار   ..

بقلم....مريم بوجعدة