بقلمي/جمال خضور(ذاكرة قلب)

قطفةشعر.. من(زورق الليل)

 (ذاكرة قلب)

قَلّا اقعدي حدّْي..
نتذكَّرْ..
أيامْ راحِتْ..
وبَعْدا بالقلبْ..
سكَّر..

أيامْ كنّا صغارْ..
بِمْراجيحْ..
معلَّقا بهاكْ الشجرْ..
نِتْمَرْجَحْ..
وتشوفنا عصافيرْ..
وماتخافنا..
نِكْبَرْ..

أيام ْهاكْ الولدنة..
شو كنّا نلعبْ سوىٰ..
 نِتْخَبّا ورا الحيطانْ..
نْخَرّبِشْ صُوَرْ..
ويضحكوا الجيرانْ..
وَمرَّاتْ...
نحكي عَ جنيّاتْ..
مانْشوفا وعَنّّا مِخْفِيّة..
روحْ ضِمِّكْ بْحِنْيّة..
لَ تخافي منْ العتمة..
ولا تاخْدِكْ جنيّة..

بتتذكّري الضحكاتْ..
شوحلوة بهاكْ الصَّدىٰ..
سَرْقتها الريحْ..
وخبّاها المَدَىٰ..

ولوووو.. ولو..
ياهالعِمرْشوكبرنا..
ولِسّْا لَ هَلَّقْ..
جُوَّاتْنا صْغارْ..
نسينا ياهالعمرشبْنا..
وبَعْدا لَ هَلّقْ..
بتْغارْ..
وتْصيرْ اتْعَصّبْ..
وتستحي..
كل ماحكّيتها شو صارْ..
بتقلّي :
حاجي استحي...
ولوووو..ياغندورة..
كانتْ بَوسِة..
ولَملَمتْ دَمْعَة..
عَنْ خَد.ْ..
صْغارْ بهاكْ العمرْ كنّا..
ولامْنَعْرِفْ غيرْاللعبّْ..
عَنْ جَدّْ..
اكبرنا..!!..
وعْمَلْنا منْ قوسْ السَّما..
زِنّارْ..
مْلَوَّنْ عَ خَصْرِكْ..
سَبعْ ألوانْ..
وألوانْ الدّْني..
تِلْبَقْلِكْ..
حَدّي بتكوني..
وضَلّْ مِشْتَقْلِكْ..
مَرْسومِةبعْيوني..
وكِيفْ فيني..؟..
إشْرَحْلِكْ..
نيسان.ْ.
ورَحْ تبقي العمرْ..
نيسانْ..
اكْبرنا وبَعْدا الولدنة..
انْحبَّا..
وليشْ ياغَنْدورَة..؟..
ما انْحِبّا..
بَعْد الحَكي..
قومي..
نِطّفي هالقَنْديلْ..
ونِغْفا عَ ذِكْرَىٰ..
لِمْواويلْ..
يمْكِنْ حلمْ الوَلْدَنة..
يمْرَقْ..
وبْهاك الهوىٰ..
يشُوفْنا..
نِغْرَقْ..
وقبلْ الصبح ْ..
ما يْفَتِّحْ عيونوا..
نِحْبِسْ هالحلمْ..
ونِبْقىٰ صغارْ..
ولابقىٰ.. نكبرْ...

          بقلمي/جمال خضور